Kandidati konservator për kancelar të Gjermanisë, Friedrich Merz, ka pësuar një humbje të papritur në Bundestag, duke dështuar të sigurojë shumicën e nevojshme në raundin e parë të votimit. Ai kishte nevojë për 316 vota në parlamentin me 630 vende, por mori vetëm 310, sipas presidentes së Bundestagut, Julia Klöckner.
Kjo ndodhi pavarësisht parashikimeve optimiste nga brenda partisë së tij, të cilët vetëm një ditë më parë ishin të bindur se Merz do ta siguronte shumicën. Pas rezultatit zhgënjyes, Klöckner ndërpreu seancën për t’u dhënë partive kohë të shqyrtojnë hapat e mëtejshëm.
Dështimi i Merz për të fituar në raundin e parë konsiderohet i pashembullt në historinë moderne të Gjermanisë. Tani, Bundestagu ka në dispozicion edhe 14 ditë për të zgjedhur sërish Merz-in ose një kandidat tjetër për kancelar. Kushtetuta gjermane nuk kufizon numrin e votimeve, por nëse asnjë kandidat nuk arrin shumicën absolute, kancelari mund të zgjidhet me shumicë të thjeshtë në fund të procesit.
Sipas analistëve politikë, kjo disfatë përbën një goditje të rëndë për Merz, dhe mund të jetë rezultat i një rebelimi të brendshëm, ndoshta edhe nga partnerët e rinj të koalicionit nga SPD, me të cilët konservatorët kishin nënshkruar një marrëveshje vetëm një ditë më parë.