Kryeministri Hristijan Mickoski nga foltorja e Kuvendit paralajmëroi zgjedhje të mundshme të parakohshme parlamentare, lidhur me përfundimin e procesit me tragjedinë në Koçan, ku humbën jetën 62 persona dhe rreth 200 u lënduan, informon PressOnline.al
Ai nuk saktësoi nëse zgjedhjet e parakohshme parlamentare do të mbahen me zgjedhjet lokale në vjeshtë, por tha se do të pranojë përgjegjësinë për tragjedinë në Koçan pasi të zgjidhen çështjet dhe se më pas do të kërkojnë besimin e qytetarëve.
PressOnline nga burime të larta pranë partive në pushtet mëson se nuk do të ishte çudi nëse bashkë me zgjedhjet lokale do të mbaheshin edhe zgjedhje të parakohshme parlamentare, për të cilën kryeministri po analizon seriozisht.
Deputeti i LSDM-së, Mitko Trajçuleski, në seancën për pyetje deputete iu drejtua kryeministrit nëse zbutja e vetëdijshme dhe tendencioze e hetimeve ka për qëllim pengimin e drejtësisë dhe mbrojtjen e zyrtarëve aktualë që janë drejtpërdrejt përgjegjës për zjarrin në disko.
“Pas më shumë se një muaji, mund të konkludojmë qartë se nuk ka asnjë vertikal moral midis pushtetarëve më të lartë, se nuk ka asnjë ndjenjë përgjegjësie morale, prandaj sot nuk kemi një dorëheqje të vetme për arsye morale. Kjo është shkatërruese për një qeveri pas një fatkeqësie të kësaj përmasash dhe me kaq shumë jetë të humbura. Por morali nuk diskutohet, njeriu ose e ka ose nuk e ka”, tha Trajçuleski.
Ai akuzoi për një hetim selektiv me qëllim mbrojtjen e bartësve aktual të posteve të larta në MPB, Inspektoratin Shtetëror të Tregut dhe institucione të tjera nga përgjegjësia e tyre.
Mickoski sqaroi se ekzekutivi vepron me urdhër të Prokurorisë Publike dhe në koordinim me gjykatën.
Ai shtoi se hetimet po udhëhiqet nga prokurori publik, i cili së bashku me gjykatën përcakton se cilat masa dhe cilët persona do të mbulohen dhe nëse zyrtarët e lartë të qeverisë duhet të mbahen në paraburgim.
“Fushata për zgjedhjet lokale do të fillojë pas pesë muajsh. Qytetarët do të thonë se kujt do të përfundojë karriera politike, e kujt do të vazhdojë karriera politike dhe në çfarë formati do të vazhdojë. Ju këshilloj që duke luajtur kartën e kujtesës afatshkurtër nuk do të fitoni pikë politike. Hetimet po i udhëheq prokurori publik, jo unë, jo Qeveria. Nëse prokurori vendos që të më ndalojnë, le të më ndalojë. Shtatë vjet na burgosët dhe deri më sot VMRO-DPMNE është nën persekutim nga prokurorët e zgjedhur nga LSDM. Do të durojmë, edhe pse burgu është për burra. Më lejoni t’i kthehem shifrave – 68 persona janë përfshirë në hetim nga Prokuroria, ndryshe nga ‘Spitali Modular’, ‘Laskarci’ dhe ‘Besa Trans’ ku humbën jetën 75 qytetarë dhe ka zero të dënuar. A do të jenë 168, nuk e di, do të thotë Prokuroria bashkë me gjykatën, jo unë”, tha Mickoski.
Ai shtoi se për bisedime janë thirrur edhe zyrtarë të lartë, se kryetari aktual i komunës është arrestuar dhe se ky ka qenë një mision i pamundur gjatë qeverisjes së kaluar.
“Të paktën ju keni të drejtë të flisni për moralin dhe etikën. Këshilla ime është që të largohen nga familjet, të më godasin, të dehidratohen nga pështymat. Ju lutem t’i lini të qetë sepse dhimbja dhe pikëllimi i tyre është i madh. Unë do të jem i pari që do ta pranoj këtë përgjegjësi, por le t’i zgjidhim gjërat së pari. Ne do të vendosim për gjithçka tani dhe kur të vendosim do të kërkojmë besimin e qytetarëve dhe të shohim nëse e meritojmë besimin e tyre”, tha Mickoski.