Java e kaluar në vend ka qenë me vranësira të ndryshueshme me periudha me diell dhe rritje të temperaturave ditore. Por, edhe pse ky mot relativisht i ngrohtë për këtë periudhë të vitit mund të shkaktojë zhvillim të parakohshëm aktiv të bimëve, ndërkaq, ende nuk përbën rrezik për lulëzim të parakohshëm dhe fillimin e vegjetacionit, thonë agrometeorologët.
Kushtet e tilla të motit, sipas tyre, janë ende brenda kufijve të qëndrueshmërisë gjatë dimrit.
“Periudhat e ngrohjes janë një dukuri e shpeshtë dhe e pafavorshme për kulturat bujqësore në kushtet e dimrit. Në përgjithësi, ato mund të jenë me periudha më të shkurtra ose më të gjata kohore. Sot dhe nesër moti do të jetë i qëndrueshëm, ndërsa të dielën pasdite, gjatë natës drejt së hënës dhe të hënën në mëngjes priten reshje të shiut, kurse në zonat malore borë. Të hënën do të fryjë erë mesatare deri e fortë veriore e cila do të shkaktojë ulje të temperaturave. Reshjet e shiut do të kontribuojnë në rritjen e lagështisë së tokës, duke siguruar kështu një furnizim të mirë me lagështi për depërtim të suksesshëm të kulturave bujqësore gjatë periudhës së zhvillimit të pranverës”, theksojnë agrometeorologët nga DPHM.
Ata rekomandojnë që, nëse kushtet e tokës e lejojnë prodhuesit bujqësorë të fillojnë ose të vazhdojnë me aktivitetet dhe kujdesin ndaj të korrave, si dhe të kryejnë punë në terren.
“Të ndërmerren masa parandaluese për forcimin e serave dhe strukturave të tjera, si dhe të pastrohen kanalet kulluese për kullimin më të lehtë të ujërave sipërfaqësore dhe mbrojtjen prej tyre”, bëjnë thirrje agrometeorologët.